Böyük Britaniya ordusunun hərbçiləri yayda tətbiq edilən 6 faizlik maaş artımına baxmayaraq, ordudan kütləvi şəkildə ayrılmağa davam edirlər.
Oktyabr ayına qədər olan 1 il ərzində silahlı qüvvələri 15 min 119 nəfər tərk edib. Onlardan 7778 nəfəri könüllü çıxış kateqoriyasına daxil edilib, yəni öz istəkləri ilə ordudan ayrılıblar. Bu müddətdə orduya cəmi 12 mindən bir qədər çox yeni şəxsin cəlb edilməsi nəticəsində ordunun ümumi sayı azalıb.
Hazırda Böyük Britaniyada hər min nəfərə cəmi iki hərbçi düşür ki, bu da indiyə qədər qeydə alınan ən aşağı göstəricidir.
Məlumata görə, ordudakı sıravi əsgərlərin real maaşı 2011-ci ildən bəri cəmi 1.9 faiz artıb. Bu göstərici yeni işə başlayan gənc həkimlər üçün 13.39 faiz, qatar maşinistləri üçün isə 10.14 faiz olub.
Qeyd edək ki, hökumət hərbi personalın işdən ayrılmasının qarşısını almaq üçün iyul ayında son 22 ildə ən böyük maaş artımı elan etmişdi.

Conflict.az