!["Müxtəlif şəraitlərdə ssenarilər tətbiq edirik" "Müxtəlif şəraitlərdə ssenarilər tətbiq edirik"](https://conflict.az/uploads/posts/2024-06/medium/1717388297_159093260795116022_1200x630.jpg)
"Belarus ordusu qeyri-strateji nüvə silahlarından istifadə üzrə təlimlərin tam silsiləsini uğurla başa vurub".
Bunu Belarus Hərbi Hava Qüvvələri və Hava Hücumundan Müdafiə Qoşunları komandanının müavini Leonid Davidoviç STV kanalına müsahibəsində deyib.
Onun sözlərinə görə, Belarus ekipajları və mühəndis heyəti uzun müddət həm nəzəri, həm də praktiki hazırlıq keçib.
“Bütün nəzarət tədbirləri, təlimlər və yoxlamalar mütəmadi olaraq həyata keçirilir. Biz daim müxtəlif şəraitlərdə ssenarilər tətbiq edirik, bəzən məşq yerlərini və ya mühitləri dəyişirik. Heyətlər hazırdır, mühəndislər hazırdır, təyyarələr çoxdan hazırlanıb”, - Davidoviç vurğulayıb.
Hərbçi həmçinin qeyd edib ki, mayın sonunda Rusiya ilə birgə keçirdikləri təlimlər zamanı NATO ölkələri bu manevrlərə nəzarət ediblər. Təlimin aktiv mərhələsində Polşa və Baltikyanı ölkələr üzərində səmalarda bir neçə erkən xəbərdarlıq təyyarəsi müşahidə edilib.
Davidoviç vurğulayıb ki, Belarus aviasiyası hər gün sərhədlər boyu Qərb kəşfiyyat təyyarələrinin uçuşlarına cavab verir, patrul xidməti həyata keçirir və dövlət sərhədlərinin təhlükəsizliyinin təmin edilməsi üzrə tapşırıqları yerinə yetirir.
Bundan əvvəl Belarus Müdafiə Nazirliyi bəyan etmişdi ki, Rusiya Ukrayna ilə münaqişədə respublikadan kömək tələb etmir.
Conflict.az