İstanbul Böyükşəhər Bələdiyyəsinin sədri Əkrəm İmamoğlu Haliç Konqres Mərkəzində jurnalistlərlə görüşüb.
Bir sıra açıqlamalar verən İmamoğlu dəyişiklik çağırışını vurğulayaraq yeni yol xəritəsini açıqlayıb. İmamoğlu açıqlamasında bu ifadələri işlədib:

"İstanbulu qazanmaq Türkiyəni qazanmaqdır. İstanbulu gücləndirmək Türkiyəni gücləndirməkdir. Mən özümü İstanbulla möhürlənmiş hesab edirəm. Mən bu şəhərə xidmət etməyi Türkiyəyə xidmət etmək kimi görürəm. Türkiyənin ən böyük şəhərində Türkiyənin problemlərinin necə həll oluna biləcəyini göstərdik və davam edirik. İstanbul Böyükşəhər Bələdiyyəsini birlikdə qorumalıyıq. Seçkilərdə İstanbulu yenidən qazanmaq üçün bir araya gəlməliyik. 2019-cu il seçkilərində olduğu kimi, partiyalararası İstanbul ittifaqının qurulması üçün əlimdən gələni edəcəyəm".

"CHP-li yoldaşlarıma səslənirəm. 2023-cü ilin may seçkilərində yaşadığımız məyusluq məni dərindən kədərləndirdi. Mən bunu dəfələrlə demişəm. Xalqımızdan üzr istədim. Səbəblərdən biri də onların seçki məğlubiyyətini qəbul etməmələri, reallıqla üzləşməyə həssaslıq göstərməmələridir. Mayın 28-i gecəsindən bəri ortaya qoyulan münasibət, təəssüf ki, partiya üzvlərimizi, seçicilərimizi anlamaq, hiss etmək qayğısından uzaqdır. Onu da bilirəm ki, bu məğlubiyyət partiyamızda köklü və əhatəli transformasiyaya səbəb olub",- deyə İmamoğlu əlavə edib.

"Bütün həyatım boyu kresloya yox, daimi missiyaya namizəd olmuşam. Bu gün bu missiya Türkiyəyə yeni siyasət və idarəçilik anlayışı gətirmək missiyasıdır. Artıq 4 ildir ki, 16 milyona bərabər xidmət göstərmək üçün yoldayam. "Namizədəm" demədim, "yola çıxıram" dedim. İstanbul üçün bir daha yola çıxıram. Mən öz şəhərinin və səsinin qayğısına qalan İstanbul könüllüləri ilə İstanbulu müdafiə etmək üçün bir daha yola düşürəm", - İmamoğlu yekunlaşdırıb.

Conflict.az