QƏTL, yoxsa İNTİHAR? (YENİLƏNDİ)

Gündəm / Kriminal

266

QƏTL, yoxsa İNTİHAR? (YENİLƏNDİ) Daşkəsən rayon Qabaqtəpə bələdiyyə sədri Məhəmməd Cəfərovun Publika.az-a verdiyi məlumata görə, cəsədləri mərhumənin bacısı Sevil Abdullayeva aşkarlayıb:

“Hadisə dünən baş verib. Ailə sakit ailə olub. Heç kimlə ciddi problemləri olmayıb. Qadının qardaşları Rafiq Abdullayev və Tofiq Abdullayev bacılarının ailə qurduqdan sonra həyat yoldaşı ilə ata mülkündə yaşamasına bir neçə dəfə etiraz ediblər. Ataları ölməzdən əvvəl evi qızının adına keçirib. O zaman isə Lətifə Abdullayeva subay olub. Bacısı Sevil Abdullayeva ifadə verəndə mən də yanında idim. Bacısı dedi ki, hər axşam ya o bizə gələrdi, ya da mən onlara gedərdi. Dünən onu heç görmədiyi üçün narahat olub evlərinə gedib və bu mənzərəni görüb. Qadının cəsədi yanmış halda yerdə olub, körpə də beşikdə yanıb. Evdə heç bir yanğın baş verməyib. Nə elektrik naqillərində, nə qazda problem olmayıb. Evə ziyan dəyməyib, oğurluq olmayıb. Bacısı deyir ki, cəsəd bu qədər yanıbsa, bir səsi çıxardı, qışqırardı. Evin yanmamağı, onlarda şübhə yaradıb. Hamımız məəttəl qalmışıq ki, hadisə necə olub. Ancaq cəsədlər yanıb, evə ciddi xəsarət dəyməyib. Cəsədlər Gəncə prokurorluğundan gələn nümayəndələr tərəfindən ekspertizaya göndərilib. İlkin ehtimallara görə, cəsəd saat 1 radələrində yanıb 3-ə, 4-ə qədər sönüb. Bacısı onları tapanda cəsədlər soyuq olub. Telefonu da özündə olmayıb, həmin gün bacısına veribmiş. Heç kimlə danışmayıb. Lakin qardaşları da, həyat yoldaşı da, anası da hadisədən xəbərsiz olduqlarını deyiblər”.

Bələdiyyə sədrinin sözlərinə görə, qonşular həmin gün ətrafda naməlum şəxslər görməyib: “Evdə yanğın olsa, istər-istəməz tüstü olardı. Bir səs olardı. Hamı hadisənin qəribəliyindən danışır”.

Mərhumun bacısı hadisənin intihar deyil, qətl məqsədi ilə törədildiyi iddia edir.

***

Daşkəsəndə evdə ana və 6 aylıq körpəsinin ölümü ilə nəticələnən yanğın hadisəsinin bəzi təfərrüatları məlum olub.

"Report"un Qərb bürosunun məlumatına görə, Qabaqtəpə kəndində ata mülkündə yaşayan 1975-ci il təvəllüdlü Abdullayeva Lətifə Mürsəl qızı və 6 aylıq oğlu Həsənli Əli İlqar oğlunun meyiti yanmış halda 2 mərtəbəli evin birinci mərtəbəsindəki otaqların birində aşkar edilib.

Körpənin meyiti yanmış uşaq arabasında, qadının cəsədi isə yerdə olub. Evdə yanğın əlaməti yalnız meyitlərin olduğu yerdə qeydə alınıb.

2016-cı ildə Həsənov İlqar Eldar oğlu ilə ailə həyatı quran L.Abdullayeva yoldaşı ilə birgə ata evində yaşayıb. Həmin mülk atasının ölməmişdən əvvəl etdiyi nəsihətə görə, onun adına keçirilib.

Qadının həyat yoldaşı bir gözündən əlildir. Ailə əlilliyə görə verilən əmək pensiyası və təsərrüfatdan gələn gəlir hesabına dolanıb.

İ.Həsənov faciə baş verən zaman tanışları ilə birgə Daşkəsən şəhərində olduğunu, yoldaşı və övladının ölüm xəbərini isə yaxınlarından aldığını bildirib. Ailənin heç kimlə düşmənçiliyi olmayıb.

Lakin qadın ilə qardaşları arasında atadan qalan mülkə görə narazılıq olub. L.Abdullayevanın 3 qardaşı var. Onlardan Rafiq Abdullayev adlı biri rayonun Astaf kəndində müəllim işləyir, Tofiq Abdullayev ad-soyadlı digər qardaş ticarətlə məşğuldur, başqa biri isə fiziki qüsurludur və Bayan kəndində yaşayır.

Qardaşlardan, əsasən qonşuluqda yaşayan Rafiq Abdullayev və Tofiq Abdullayev bacılarının ata mülkündə öz həyat yoldaşı ilə yaşamasına əvvəllər bir neçə dəfə etiraz ediblər. Məhz bu səbəbdən L.Abdullayevanın sözügedən qardaşları ilə arasında soyuq münasibət yaranıb.

Lakin onlar da baş verən faciədən xəbərsiz olduqlarını və hadisənin intihar məqsədi ilə törədildiyini düşündüklərini bildiriblər. L.Abdullayevanın anası və bacısı da hadisənin intihar olduğunu bildiriblər.

Bununla belə, hadisənin kimsə tərəfindən qətl məqsədi ilə törədildiyi də istisna olunmur.

Faktla bağlı Daşkəsən Rayon Prokurorluğunda araşdırmalara başlanılıb.

***

Daşkəsən rayonunda iki nəfərin ölümü ilə nəticələnən yanğın hadisəsi baş verib.

"Report"un məlumatına görə, Qabaqtəpə kəndində yaşayan 1975-ci il təvəllüdlü yerli sakin Lətifə Abullayeva və 6 aylı oğlu Həsənli Əli İlqar oğlu evdə yanmış vəziyyətdə aşkar edilib.

İlkin məlumata görə, evi qadın özü yandırıb və hadisə intihar məqsədi ilə törədilib.

Faktla bağlı Daşkəsən rayon Prokurorluğunda araşdırma aparılır.


Conflict.az