SUMQAYITDA SƏRNİŞİNLƏR MARŞRUT XƏTTİNİN LƏĞVİNƏ ETİRAZ EDİBLƏR - PULSUZ AVTOBUS XƏTTİ AÇILIB

Cəmiyyət

76

SUMQAYITDA SƏRNİŞİNLƏR MARŞRUT XƏTTİNİN LƏĞVİNƏ ETİRAZ EDİBLƏR - PULSUZ AVTOBUS XƏTTİ AÇILIBSumqayıt şəhərində fəaliyyət göstərən 55 nömrəli marşrut xəttinin bağlanması sərnişinlərin narazılığına səbəb olub.

ONA-nın yerli bürosunun məlumatına görə, sərnişinlər bu gün səhər saatlarında marşrutun son dayanacağında toplaşaraq "Sumqayıt Nəqliyyat" MMC-nin direktoru Xannı Rüstəmova öz etirazlarını bildiriblər. Sakinlər xəttin fəaliyyətini dayandırılmasından əziyyət çəkdiklərini və bunun əlavə problemə yol açdığını qeyd ediblər.

Qeyd edək ki, sözügedən marşrut xətti şəhərin mərkəzi bazarından "Naxalstroy" deyilən yaşayış massivi istiqamətində fəaliyyət göstərib. Artıq həmin ərazidə yaşayan sakinlərin problemi qismən həllini tapıb. Belə ki, Sumqayıt Avtomobil Nəqliyyatı ilə Sərnişindaşıma İdarəsinin rəisi Tofiq Saydumov ONA-ya açıqlamasında bildirib ki, 5 nömrəli marşrut xətti uzadılıb və bununla yanaşı, sakinlərin yaxın marşrut xəttinə çıxarılması üçün müvafiq tədbirlər atılıb: "Bunun üçün həmin ərazidən yaxın marşrut xəttinə 3 ədəd avtobus işləyəcək. Bu avtobusların xidmətindən sakinlər pulsuz istifadə edəcəklər. Həmin sürücülərin əməkhaqları isə idarə tərəfindən ödəniləcək".