Ustaların pulunu verməyən "HERMES-S” MMC tikinti şirkətinin rəhbəri: “Mən “YUXARILARA” hesab verirəm” » Conflict.az

Ustaların pulunu verməyən "HERMES-S” MMC tikinti şirkətinin rəhbəri: “Mən “YUXARILARA” hesab verirəm”

Gündəm / Cəmiyyət

35

Ustaların pulunu verməyən "HERMES-S” MMC tikinti şirkətinin rəhbəri: “Mən “YUXARILARA” hesab verirəm”Bir neçə gün bundan əvvəl ötən il ərzində görülmüş işlərlə bağlı mətbuat konfransı keçirən Korrupsiyaya qarşı Mübarizə Baş İdarəsinin rəisi Kamran Əliyev bildirdi ki, rəhbərlik etdiyi quruma ən çox şikayət banklardan və tikinti şirkətlərindən daxil olur.

Baş İdarə rəisi qeyd edib ki, şikayətlərin sayına görə ilk yerdə banklar, ikinci sırada tikinti sektoru dayanır: "Tikinti şirkətləri tərəfindən vətəndaşların aldadılması halları azalsa da, təəssüf ki, bu cür hallar yenə də var”.
Ustaların pulunu verməyən "HERMES-S” MMC tikinti şirkətinin rəhbəri: “Mən “YUXARILARA” hesab verirəm”

Bir qrup vətəndaşın – Hakim Kərimov, Oqtay Talıbov, Fikrət Novruzov, Qərib Baxşəliyev və digərlərinin müraciəti də tikinti şirkətlərinin vətəndaşları aldatması hallarının hələ də geniş yayıldığından xəbər verir. 20-yə yaxın usta və fəhlənin şikayəti "HERMES-S” MMC-dəndir.

Sayta şikayət ərizəsilə müraciət edən usta və fəhlələr "HERMES-S” MMC-nin rəhbərliyinin həm dövlətə fırıldaq gəldiyini, həm də onların bir neçə ay ərzində gördükləri işə görə almalı olduqları vəsaiti vermədiyini iddia edirlər. Usta və fəhlələr bu şirkətin şəhərin mərkəzində tikdiyi 17 mərtəbəli otel binasında işləyib, pullarını ala bilməyiblər. Şirkət rəhbərliyi binanın 7 mərtəbəsini təmir edən ustaları guya keyfiyyətsiz iş gördüklərini əsas gətirərək uzaqlaşdırıb, pullarını isə verməyib. Lakin şikayətçilər bildirirlər ki, bu, bəhanədir. Çünki bütün işlər işverənlərin nəzarəti altında görülüb, bunlar uzaqlaşdırılandan sonra isə onların təmir etdikləri mərtəbələrdə heç bir düzəliş aparılmayıb, sadəcə divar kağızı vurulub. Keyfiyyətsiz iş söhbəti bəhanədir və ustalara olan borcu verməmək üçün uydurulub.
69
Şikayətçilər bildirir ki, ötən müddətdə şirkətin Ağa adı ilə tanıdıqları rəhbərinə (soyadını bilmirlər-red.) gördükləri işin zəhmət haqqını verməsi barədə dəfələrlə müraciət ediblər. Ancaq o, pulu ödəməyəcəyini deyərək, onları şirkətdən qovub: "Dedi ki, sizə pul ödəməyəcəyəm. Biz şikayət edəcəyimizi dedikdə isə heç nədən çəkinmədiyini söylədi. Dedi ki, "hara istəyirsiz şikayət edin, mən "yuxarılara” hesab verirəm, mənə heç kim heç nə edə bilməz”.

Şikayətçilərin sözlərinə görə, "HERMES-S” MMC-nin rəhbəri çox yüksək vəzifədə olan birini işarə edərək, ona "haqq” verdiyini, buna görə də heç kimdən çəkinmədiyini söyləyib.

Ərizədə həmçinin işçilərdən bəzilərinin Korrupsiyaya qarşı Mübarizə Baş İdarəsinə şikayət üçün getdiyini, ancaq oradan məhkəməyə müraciət etməyin məsləhət görüldüyü bildirilir: "Ancaq "HERMES-S” şirkətində işlədiyimiz müddətdə dəfələrlə tələb etsək də, bizimlə əmək müqaviləsi bağlanmayıb. Buna görə də bizim əlimizdə məhkəməyə müraciət etmək üçün rəsmi sənəd yoxdur”.

Şikayətçilərin sözlərinə görə, "HERMES-S” MMC-nin rəhbərliyi əvvəlcədən işçilərin pulunu mənimsəməyi planlaşdırdığından, onlarla müqavilə bağlamayıb. Bununla həm də dövlətə ödənilməli pullar da mənimsənilib. Ancaq kiçik araşdırma aparmaqla onların həmin şirkətdə gördüyü işləri müəyyən etməyin mümkün olduğunu bildirirlər.

"Buna görə də biz mətbuat vasitəsilə ölkə Prezidentinə, hüquq-mühafizə orqanlarına müraciət edərək, "HERMES-S” MMC-nin rəhbərliyi tərəfindən mənimsənilmiş pullarımızın bizə qaytarılmasının təmin olunmasını xahiş edirik. Əks halda Azərbaycan vətəndaşlığından imtina edəcəyik!” – deyə, şikayətçilər bildirirlər.

İşçilərin sözlərinə görə, "HERMES-S” MMC-nin rəhbərliyi tərəfindən onların ümumilikdə 30 min manatdan artıq pulu mənimsənilib. Sayta təqdim olunan siyahıdan məlum olur ki, aralarında 80 manat pulu mənimsənilən rəngsaz da var, 13 min manatdan artıq pulu verilməyən briqadir də.

Onu da qeyd edək ki, "HERMES-S” MMC-nin rəhbərliyi tərəfindən işçilərin pulunun mənimsənilməsinə dair bundan əvvəl də mediaya şikayətlər olub.

Məsələn, bir müddət bundan əvvəl mətbuata müraciət edən İsmayıllı rayonu Şəhriyar küçəsi 35-də qeydiyyatda olan, Bakı şəhəri Xəzər rayonu, Qala qəsəbəsi yeni yaşayış massivində yaşayan Tağıyev Məhərrəm Nadir oğlu "HERMES-S” MMC tərəfindən 1269 manat əməkhaqqının mənimsənildiyini bildirmişdi. O, "HERMES-S” MMC-nin paytaxtın Hüsü Hacıyev küçəsində inşa etdiyi yeni binada işləyib, ancaq pulunu ala bilməyib.

Başqa bir vətəndaşın şikayətində isə "HERMES-S” MMC şirkətinin heç bir xəbərdarlıq və razılaşma olmadan onun evinin qanunsuz olaraq sökərək, yerində hündürmərtəbəli yaşayış binası inşa etdiyi bildirilib: "Dəfələrlə sözügedən şirkətin rəhbərliyinə qanunsuz hərəkətləri nəticəsində dəymiş ziyanın ödənilməsini tələb etsəm də, hər dəfə təklifim rədd olunub”.

Bu şikayətlər "HERMES-S” MMC-nin rəhbərliyinin insanları işlədib, pulunu mənimsəməyi bir ənənə halına saldığını düşünməyə əsas verir.

Təsadüfi deyil ki, Prezident Administrasiyasına barəsində ən çox şikayət edilən tikinti şirkətləri arasında "HERMES-S” MMC-nin də adı var. Bunu fevral ayında keçirdiyi mətbuat konfransında Azərbaycan Respublikası Prezidenti Administrasiyasının Sənədlərlə və vətəndaşların müraciətləri ilə iş şöbəsinin müdiri Süleyman İsmayılov açıqlamışdı. O, ən çox şikayət edilən tikinti şirkətlərinin adlarını açıqlayarkən, "HERMES-S” MMC-nin də adını çəkmişdi.

O, tikinti şirkətləri tərəfindən yol verilən dələduzluq və korrupsiya hallarının kökünün kəsilməsi üçün hüquq-mühafizə orqanlarının lazımı tədbirlər görəcəyini bildirmişdi.

Ancaq şikayətlərdən belə görünür ki, hüquq-mühafizə orqanları hələlik "HERMES-S” MMC ilə bağlı hər hansı tədbir görmək istəmirlər. Maraqlıdır, niyə, bu şirkətin arxasında kim durur?

Qeyd olunanlarla bağlı "HERMES-S” MMC-nin rəhbəri Ağa müəllimlə əlaqə saxlamaq cəhdi baş tutmayıb. Şikayətçilərin şirkətin məsul şəxslərindən biri kimi adını çəkdikləri Akif adlı şəxs isə sayt əməkdaşlarına bildirib ki, işçilər işi yekunlaşdırmadıqlarından onlara pul verilməyib. O, şikayətə yazılı münasibət bildirəcəklərinə söz versə də, 4 gün ərzində sözünə əməl etmədi. ( AzPolitika.info)


Conflict.az məlumatda adı çəkilən qurum və ya şəxslərin də cavab haqqlarını tanıyır, dərc edə bilər

Conflict.az